Ինչո՞ւ կծու սննդի վրայից չի կարելի ջուր խմել. news.am

Կծու սնունդը՝ լինի դա չիլի պղպեղ, թե կարրի, ասես այրում է բերանն ու ներքին օրգանները: Պատճառն այն է, որ կծու մթերքներում կա կապսաիցին կոչվող նյութ, որն ազդում է լեզվի վրա գտնվող ցավային ռեցեպտորների վրա: Հետաքրքիր է, որ կծու մթերքներից հետո ջուր խմելն անիմաստ է, դրանից այրոցը չի թեթեւանա, նույնիսկ ավելի կուժեղանա:

Ինչո՞ւ: Այս հարցին փորձել են պատասխանել American Chemical Society -ի մասնագետները:

Կապսաիցինը անգույն ու անհոտ նյութ է, որն ազդում է ցավի զգացողությունների համար պատասխանատու ռեցեպտորների վրա: Այդ ռեցեպտորները, սովորաբար, ակտիվանում են, երբ մարդը եռման ջուր է խմում կամ ինչ-որ թթու բան ուտում, որը կարող է վնասել առողջությանը: Կապսաիցինի ազդեցության տակ ռեցեպտորներն ուղեղին ազդանշան են ուղարկում այն մասին, որ մարդը կարծես թե ուտում է մի բան, որը չպետք է ուտեր: Նրա մարմինը՝ ուղեղի ղեկավարությամբ, միանգամից արձագանքում է. աչքերը սկսում են արցունքոտվել, քիթը փակվում է, հայտնվում է այրոցի զգացում ու խմելու ցանկություն: Այդ բոլոր ռեակցիաների նպատակն է օրգանիզմից դուրս մղել անցանկալի նյութն ու չեզոքացնել դրա ներգործությունը:

Եթե մարդը որեւէ կծու բան ուտելուց հետո ջուր խմի, ջուրն է՛լ ավելի կտարածի կապսաիցինը նրա բերանում ու կուժեղացնի այրոցի զգացումը, քանի որ կապսաիցինը ջրում չի լուծվում: Ջրի փոխարեն մասնագետները խորհուրդ են տաիս կաթ խմել, որում կապսաիցինի մոլեկուլները կկարողանան լուծվել, հեշտացնելով մարդու վիճակը ու նրան ազատելով այրոցի զգացումից: Բացի դրանից կաթնամթերքում կա կազեին կոչվող նյութ, որը դեպի իրեն է ձգում կապսաիցինի մոլեկուլները:

Եվ այսպես, եթե  չափազանց կծու սնունդ եք կերել, ավելի լավ է վրայից կաթ խմեք կամ պաղպաղակ ուտեք, որոնք կօգնեն ռեցեպտորները մաքրել կապսաիցինից:

Հարցեր, պատասխաններ, մեկնաբանություններ